Interpreter!

I improvised to act as consecutive interpreter for an interview with a Western African conference-goer. Very embarassed, as I didn't know exactly what he said. And I didn't know the word 'subsidy' in French. Took me minutes to describe it.

It was a sound-recording interview from UN radio. I think they will not use my sound-bit.

But I am really excited!

星加坡、馬來西亞之後

兩個地方俾我嘅感覺﹐都同我去之前心目中嘅印象唔同。個個都話星加坡好乾淨﹐地方好少。我就見到佢好企理﹐但唔係醫院嗰種冇人氣嘅一塵不染。話佢地方少﹐佢面積係細過香港﹐但係平地佢多過香港多多聲！周圍無啦啦都會有塊乜都冇嘅大草地；啲路又直又闊又長。
馬來西亞啲車路﹐一如Lonely Planet所講﹐質素好得很。市際巴士班次很多﹐車很舒服。我冇諗過嘅係﹕一個遊客在馬來西亞﹐基本上唔會受人埋身拉客。啲人係會問你「的士﹖」、「租電單車﹖」、「買手信﹖」。你話唔買﹐佢地就算﹐唔會chuer住你。我地朝早八點前就到達Pangkor島﹐想租單車﹐點知太早﹐Ｄ舖頭未開﹐淨係得電單車租。啲島民都好熱心話俾我地知邊到有單車租﹝雖然我地去過間舖頭﹐見到未開﹞。在條街行行企企等開門﹐一個半小時前見過﹐做租電單車嘅人咁啱又揸車經過﹐重叫我地去邊間舖頭﹐話間舖而家開咗啦咁。
馬來西亞好多獨立屋﹐鄉村地方啲屋都好企理架。周圍都係樹。啲樹好高。在金馬侖(Cameron Highlands) Jungle Trekking時可能走錯路﹐入咗叢林﹐啲泥好鬆﹐一枝竹輕輕插落地﹐成兩呎入咗去。啲泥一定好肥沃。

東南亞

我就來放假啦﹐可能去東南亞。下星期就係啦﹐仲未買機票﹐因為仲未決定去邊。

又去台灣

兩年之內去三次﹐有D厭。不過諗咗好多日都諗唔到放假去邊度好﹐去吓台灣點都好過
AU响屋企咁多日。買咗淨機票﹐有D唔抵﹐但係睇Lonely Planet見到cheap cheap 旅舍
嘅資料。啱啱用電郵訂咗一間單人房﹐500NTW。雙人房都不過係550咋。一個人去旅行
就係貴在呢度。如果間野亁淨嘅話就都好嘅。

睇過吓D人環島單車行嘅日記﹐似乎即使踩花蓮-台東呢段最平坦最好景嘅路﹐都需要好
多準備工夫。我諗我都只可以踩吓一日遊。

書

中央圖書館有本新書叫〈Cantonese as Written Language〉。個書名吸引咗我。掀過幾頁﹐都幾學術架﹐不過應該會有心機睇落去。可惜嗰日六個quota滿晒﹐唯有記低書名﹐遲啲借番。呢啲書冇可能會搶手嘅。

講開圖書館﹐本〈Justice Game〉我等咗怕有五個月﹐重係全部被借出或者預約咗。〈我的名字叫紅〉重勁﹐幾十本遍布港九各地都被人借晒。我又唔覺呢本書有好多人評論喎。

〈印刻文學雜誌〉都都唔知邊度買得到。洪葉又執咗﹐銅鑼灣樂文有呀﹐買緊零五年一月號﹗

抽到網球班啦

之前報過幾次網球班﹐維園同京士柏都試過。啲場咁旺﹐抽極都抽唔到。今次轉攻黃大仙﹐一次就中嘞。個場在亞洲電視隔住龍祥道（定呈祥道﹖）對面﹐睇地圖好似好近黃大仙地鐵站﹐於是求其報咗先算。後來搭車經過﹐似乎個場同地鐵站嘅距離﹐遠在腳程之外。
後日就係中籤者俾錢嘅限期。究竟要唔要呢個機會好呢﹖

有得放假﹐但去邊﹖

八九個月嘅非人生活過去咗嘞。終於拿到假期。拿一連五天假期唔算多啩﹐咁都充滿障礙。好似最好你永遠唔使休息廿四小時on call。
假期係定咗嘞。問題係﹐去邊﹖點過﹖點都唔會跟旅行團。一個人嘅package﹐貴好多。最麻煩嘅係﹐諗唔到邊到我最想去。

終於撞到

終於撞到嘞。忍唔住﹐搭咗一句。

近排時間過得好快

前星期先發現今年復活節在三月尾﹐正在趕工﹐即是冇得請假啦。今個星期又發現原來農曆新年嗰幾日假期係星期三四五﹐黐住六日。一連五日假﹐不過冇準備點放。

為咗用去一張贈券﹐一口氣買咗五隻VCD。新年可以去大家姐屋企避年兼睇碟。

上壁球堂﹐打極都打得唔好。今日換咗手柄膠﹐睇吓會唔會好啲。

今朝主動放棄咗高級滑浪風帆班嘅報名機會。

肚餓悲傷

我諗我有病。近幾個月來﹐晚飯前如果係肚餓嘅話﹐就會覺得悲傷。食完飯﹐嗰種悲傷就會消失。