幫曾寶儀開車門

曾寶儀响鏘鏘三人行大讚某男士（唔係佢男友）幫佢開車門﹐令佢覺得好受尊重。呢番話每日都有人講﹐原本唔值得提﹔令我意外嘅係連曾寶儀都咁樣講啊。佢間中會上鏘鏘﹐我對佢嘅印象全部都係來自呢個節目。我感覺佢係好關注女人嘅社會角色嘅。

因為一個人係女人而幫佢開車門﹐呢個行為將嗰個人係女性呢一面放响佢所有面向之前。「係女人」本身已經預設咗我要幫佢「開門」﹐本身先至係唔尊重嗰個人。高官、貴賓出入自然一樣有人幫佢地開車門。但係與其話係對呢個人嘅尊重﹐不如話係對個制度。佢係因為佢嘅身份﹐而唔係佢個人嘅本質而得到呢種待遇。

好多被認為係男士風度嘅行為﹐都係將一個個活生生唧女人表面化做「女性」﹐將一個身份變成一個不證自明嘅理由。同樣﹐「你係唔係男人來架﹖」呢啲說話都係。我並唔係為男人開脫﹐呢啲表面化一樣有加諸女人身上。點解女人﹐因為係女人﹐就要溫柔﹖要識煮飯﹖

點解連曾寶儀都鍾意有人幫佢開車門﹖究竟有冇女人唔係咁樣諗架﹖

我對一般人嘅回應係﹕因為我尊重你﹐先至唔幫你開車門﹔而對我提唔起嘅人﹐我就會笑笑口﹐好有風度咁做足全套。